منى عبداللطيف
Forum Replies Created
-
بسم الله البارئ
حضرتك محتاجة تمشى فى عدة إتجاهات أولها وأهمها إنك تروحى لمختص يعمل خطة علاج هدفها الرئيسى التعامل مع الأفكار وفى طرق كتير للتعامل مع الأفكار علشان تقدرى تطردى الأفكار والواسوس اللى بتجيلك بإستمرار
الإتجاه الثانى حاولى خلال الفترة دى تعلى طاقاتك الإيمانية علشان حفظنا وحفظ ولادنا وسبل الخير لينا وليهم بأيد الله وحده وإحنا كلنا أسباب لبعض فالحفظ والأمن بيد الله
الإتجاه الثالث محتاجه تشغلى بالك كتير بأمور مختلفة تخليك تنظرى لحياتك بشكل مختلف ومنها تشغلى بالك علشان تقل الأفكار
الإتجاه الرابع وهو الرياضة والغذاء الرياضة بتجعل الجسم أهدى من التوتر وبتزيد الهرمونات اللى بتقلل التوتر والخوف حتى لو بشكل بسيط زى المشى فى البيت وموجود على اليوتيوب كتير وكمان الغذاء هيساعد جسمك إنك تكونى مستريحة وميزدش التوتر عندك لإن جزء كبير من الأعصاب بيكون حول الجهاز الهضمى فكل دى أمور هتساعدك تتغلى على اللى بتشعريه بيه مع خطة العلاج
وربنا يعافيك من أى سوء ويحفظك
-
بسم الله الهادى
أولاً مهم إنك تشتغلى على أفكارك شوية يعنى فكرة إنك مش شايفة نفسك جميلة ده محتاج إنك تغيير الفكرة دى من دماغك لإن مفيش حد هيشوفك جميلة طول ما إحساسك بنفسك كده ، مش لازم أشوف نفسى ملكة جمال لكن محتاج أشوف نفسى إنى من صنع الله ونفخ فيا من روحه وفيا حاجات كتير فى روحى وتصرفاتى جميلة فأستحق أن أكون جميلة، والفكرة الثانية إن فرصك قليلة فى القرية دى حاجة بردوا محتاجه تشتغلى عليها لإن الرزاق هو الله فى أى وقت وفى أى مكان وبما أن إنتى فى البلد وفكرك وإجتهادك وصلك لكلية تجارة إذن هيكون فى ناس تانية عندهم نفس الشئ وممكن جداً أجد فرصة عظيمة فالرزاق موجود
ثانياً ممكن تعودى مع أهلك وتكلميهم بالراحة فى إنك لسه صغيرة ومحتاجة تطورى فى نفسك وفكرك وتشتغلى وإنك مش حاسة إنك مرتاحة فى خطوة الزواج حالياً أو مش مستعدة نفسياً وفى الآخر هما كل اللى يهمه إنك تكونى سعيدة وخلى عندك نية طيبة بالخير من جواكى وربنا هيكرمك وعلى يقينك بالله فكل ما زاد إيمان ويقينا بالشى بيحدث سواء بالسلب أو الإيجاب
ثالثاً ممكن لو إرتبطى بالعريس تشوفى فيه الشخص اللى تتمنية وهو يشوف فيك الفتاة اللى يتمناه لإن ممكن جداً تجاربه السابقة وصلته لفكرة جوازه والسلامة ولكن لما يلاقيكى مختلفة يكون مختلف معاكى ويحبك وتكون علاقتكم علاقة نجاحه وإنتى كمان ممكن تكونى مش عارفه كويس ولما تعرفيه تتأكدى من إحساسك إنه شخص سيئ فتفكوا الخطوبة أو تكملوا لو حاسيتى إنه يستاهل وشاريك وشخص قادر على مسئولية الزواج وده مش فى يوم وليلة، ففكرى وإهدى وشوفى الأنسب ليكى إية وربنا يصلح حالك ويوفقك للخير
-
بسم الله البارئ
حضرتك محتاجة تشتغلى فى إتجاهين
الإتجاه الأول هو الأفكار لإن واضح أن الأفكار اللى مسيطرة عليكى أفكار سيئة وتركيزك العالى فيها بيجعلها تزيد وتستمر وبالتالى تشعرى بالإكتئاب والحل إن تشتغلى على تغيير هذة الأفكار وفى طرق كتير للتحكم فى الأفكار وتعديلها ممكن تعملى ده بمفردك بإنك تفكرى فى أمور وأشياء جيدة مريتى بها وتحاولى كل ما تأتى أفكار سيئة تبعديها ولو مش قادرة تنفذى الطريقة دى بيكون من خلال جلسات التعامل مع الأفكار مع مختص
الإتجاه الثانى وده مهمه جداً وهو إنك تشغلى وقت بحاجات ذات قيمة تشعرك بالراحة النفسية تجاه نفسك، أيان كانت حتى لو بسيطة والقيمة ليست معناها أنى أعمل أشياء عظيمة فى الكون وأصعبها على نفسى ولكن الإهتمام بأمورك البسيطة فى البيت والأولاد ذات قيمة وإهتمامك بنفسك وصحتك ذات قيمة حتى طرق عبادتك وصلاتك مع الله ذات قيمة فكل تلك الأمور هتريحك نفسياً ويفضل قبل أن تنامى إجلسى وتذكرى الأمور التى قمتى بها اليوم فهى إنجاز فهناك الكثير الذين لا يستطيعوا عمل جزء بسيط من الذى فعلتيه وإشكرى ربنا على أى شئ أنجزتيه فالشكر يزيد النعم ومع الوقت هتشعرى بالراحة وطاقتك هتعلى وتزيد إنك تنجزى وتعمل أكثر
ربنا يحفظك من كل سوء
-
بسم الله الحفيظ
فى البداية ربنا يحفظك من كل شر وسوء ويعطيكى الصحة ، فكرة إنك بتتعبى وتشعرى بإكتئاب بكثرة له أسباب مختلفة ومحتاجين نعرف جذرها إيه علشان نتعامل معاها بس فى شئ مهم جداً أن أساس بدايات أى إكتئاب هو قلة الشغف لعمل أى شئ وعدم تحقيق أى إنجاز وهنا نحتاج إلى أن تشغلى نفسك بأمور مختلفة تكون محبوبة ليكى علشان تشعرى بالإنجاز ومهم إنك تركزى دايماً على فكرة تذكر الأشياء التى تستطيع إنجازها حتى تشعرى بالراحة وتشكرى الله عليها حتى تزيد وعليكى بالتعامل مع الأفكار السيئة التى تجعلك فى حالة سيئة وهناك طرق عديدة للتعامل مع الأفكار بتكون حسب الحالة والدرجة المسيطرة عليكى
ربنا يبعد عنك أى شر
-
بسم الله البارئ
ألف سلامة على حضرتك
فى البداية أنا لا أعمل بأى مواد كيميائية لا أستخدم أى أدوية فلا أستطيع أن أفيدك فى فكرة تأثير دواء على دواء يعمل إيه لكن بلا أدنى شك أن تناول الأدوية بإستمرار يؤثر على الجسم كله ومع الوقت يفقدها تأثيرها، لكن اللى أقدر أقول لحضرتك أن المشكلة عندك فى الجزء الخاص بالخوف لإن كثرة الخوف بتجعل المخ يعطى إشارة للجسم يفرز هرمونات كتير يأمن نفسه بيها علشان بيكون حاسس إنه فى خطر والهرمونات دى بتأثر على الحالة المزاجية بإنك تكون شاعر بالقلق والضيق وتساعد الجسم على إنه يكون فى حالة يقظه علشان يكون فى وضع إستعداد لأى شئ ممكن يحصل فجأة والشئ السيئ فى هذا الوضع إنه لما بيتكرر كتير المخ بيعتاد أنه يخلى الجسم يفرز كل الهرمونات دى بإستمرار حتى لو مش عندك نفس حجم الخوف كل يوم لإنه بيحول الأمر لعادة
والحل بيكون فى إننا نشتغل على الخوف علشان نعالج جذورة وده عن طريق الأفكار وكمان المسارات العصبية اللى فى المخ لفترة حتى يغير المخ عادات الخوف لعادات الأمان وكل ما هيقل الخوف كل ما هتقدر تنام بشكل سهل
أنصحك فى الفترة الحالية على أد ما تقدر متزودش الهرمونات التى تجعلك متيقظ كتير وده من خلال الأتى
حاول تمشى كل يوم على أد ما صحتك تقدر لإن ده بيساعد الجسم على إنه يقوم بالوظائف الحيوية للجسم وكمان بيزود فى الجسم هرمون الدوبامين وده بيقلل من وجود الهرمونات التانية بالتبادل كل ما هو يزيد هما يقلوا
حاول تأكل خضروات وفاكهة فى اليوم لإنها بتساعد الدم اللى فى الجسم إنه يكون قلوى فيعلى عندك المناعة ويقلل من تواجد إحساس القلق والإضراب وإشرب مياة بشكل كويس وقلل من الأكل اللى بيخلى الجسم يبذل مجهود كبير بالليل يعنى كل اللى تحبه بالنهار وخلى فترة الليل للحاجات البسيطة علشان جسم ميكونش مجهد بالليل، وقلل من المشروبات اللى فيها كافيين بالليل
يفضل إنك تبعد بالليل على الشاشات قبل النوم من نص ساعة لساعة لإن الضوء الأزرق الخارج من الشاشات بيقلل من هرمون المسئول عن النوم بيجعلك فاقد الإحساس بالشعور بالنوم فممكن لو حابب تشغل نفسك بشئ قبل النوم ممكن تجعله سماعى زى الراديو أو أى شئ مسموع
وربنا يعافيك من كل سوء ويعطيك الصحة
-
وعليكم السلام
بسم الله الهادى
إنت فعلاً محتاج تحكى مع حد لإن إحساس الإختناق بيجى لما تكون حاسس إن عندك كلام كنت عايزة تقوله فى أكتر من موقف ومتقالش فيجيب إختناق وممكن يوصل لإحساس ألم فى الحلق والصدر
وألف باء أسباب الإكتئاب هو عدم وجود أمور فى حياتك تشغلك وتكون بتحقق شغفك عندك
نصحتى ليك إنك أولاً بلاش توصف نفسك بأسم مرض معين لإن عقلك وإحساسك هيصدق الشئ اللى وصفت نفسك بيه وممكن يكون شئ اللى عندك أبسط من كده
ثانياً إشغل نفسك بأمور تكون مريحه ليك وتحقق شغف عندك
ثالثاً ممكن تعود مع متخصص علشان تنظم أفكارك ومشاعرك وكمان نمط يومك والأمور اللى بتقوم بيها
وبتتعمل خطة علاج تمشى فيها علشان تبدأ تتعلم إنت إزاى تفهم مشاعرك وتتعامل معاها إزاى فى كل موقف والطرق اللى بستخدمها أنا فى شغلى بتكون بدون أدوية وربنا يعافيك دايما
-
السلام عليكم
بسم الله النور
أولاً ربنا يوفقك ويصلحلك حالك مع أسرتك كلها ومع شغلك
ثانياً أساس الفكرة والموضوع من عندك إنت هو كثرة خوفك وتركيزك على هذا الخوف هى اللى هتوصل للولاد وتحصدوا جميعاً نتايجها، عارفه أن الحياة فى الدول الأجنبية فيها أمور مختلفة عن مجتمعنا وده نتيجة لإختلافنا بس لو هديت وفكرة شوية هتلاقى أن فى الوقت الحالى ولادنا بقوا يقدروا يشوفوا أى شئ من أى مكان فى العالم وهما فى غرفتهم فى بلدك فمباقش الفكرة فى البعد طبعاً لما يكونوا هناك هيشوفوا أكتر لكن هيكون ده الشئ المعتاد اللى بيشوفوه كل يوم فهيعطى إحساس مختلف عندهم بمعنى لما يكونوا فى بلدهم وبيحاولوا يشوف أى شئ هيحاولوا يشوفه بشكل غير معلن إنما لما تكون دى حياتهم وبيشفوها معاكم هنا هيقدروا يسألوكم ويحكوا معاك إنت ووالدتهم وتبدأ توضحوا الإختلاف وتكلمهوهم عن إزاى فى بينا فروق ودورنا نتخطها ونقدر نتعامل مع الأخرين رغم إختلافنا وأن طبيعى إننا نتعامل مع ناس مختلفين عنهم وكان ممكن نلاقى كده فى بلدنا عادى جداً الحياة دلوقتى إختلفت عن زمان
اللى محتاج تعمله
أولاً إنك تتعامل إنت مع خوفك لإنه بشكل غير مباشر هيوصل لهم وهيكون هما كمان كده ده غير إن زيادة خوفك بعد الشر هتتحول مع الوقت لشئ جواك تجعل اللى بتخاف منه يحصل فمحتاج تهدأ وتعرف إزاى تتعامل مع أفكارك وحاول فيها مع نفسك ولو معرفتش ممكن تعملها مع مختص
ثانياً خد من الأمر اللى إتحطتوا فيه كلكم فرصة وتحدى إنكم تطور مهارتكم جميعاً بإننا نتعامل مع ناس مختلفين ونتكيف وننجز وننجح فى اللى بنعمله وده كان ممكن يحصل فى بلدك ودلوقتى فى طرق كتير بنشتغل فيها مع الولاد فى تنمية مهاراتهم الحياتية واللى منها التكيف
ثالثااً خدها فرص وصاحبهم وإتكلم معاهم وعلمهم يتعلموا مرة على مرة يختاروا أصحاب وطبعاً يكون بناءا متوافقين مع مبادئكم وقيمك وأن شاء الله هيلاقوا وإعرف أن ربنا لا يكلف نفسا إلا وسعها فالله أعطاكم كلكم الشئ فإذن إنتم وسعه
وربنا يهديك للشئ اللى ينور بصرتك وبصيرتهم
-
السلام عليكم
بسم الله البارئ
نصحتى ليك لا تقول على نفسك وصف بمرض معين لمجرد أن بتسمع كده لإن ممكن يكون عندك شئ تانى وبمجرد وصفك لنفسك هذا الشئ مع الوقت عقلك هيسجل ده وهيكون فعلا كده
أولاً حاول تشغل عقلك وحياتك بأمور مريحه ليك وتكون بتعملها بشغف لإن أساس أى ضيق نفسى هو عدم الإحساس بأنك بتعمل أشياء مهمه فى الحياة وبتعانى من التفكير الطويل فى أمور سيئة فمحتاج تشغل وقتك بشكل كبير علشان تقل الأفكار دى
ثانياً محتاج تتكلم مع متخصص علشان يعلمك إزاى تقدر تتعامل مع الأفكار والمشاعر بتاعتك وتعرف إزاى تعمل جدول ليومك تكون فيه حاسس إنك بتنجز أمور بتسعدك وتكون مهتم بيها
وربنا يعافيك من كل سوء
-
السلام عليكم
بسم الله البارئ
ألف سلامه عليكى وربنا يعافيكى
أولاً هو من كلامك أن بتكتمى كتير وتسكتى كتير فده بيخلى الشيطان يدخلك كتير وفكرة زيادة القلق والتوتر بسبب أو بدون سبب ده ناجم من أن المخ لما بيلاقى عندك قلق وتوتر بيدأ يفرز هرمونات القلق علشان يأمن الجسم مثل الأدرينالين والكورتيزول ومع الوقت المخ والجسم بيتعودوا على إفراز الهرمونات دى بكثرة بمجرد التفكير البسيط منك لأى شئ وتعطى ليه وصف بإنه ممكن يوتر أو يقلق أو علشان المرض اللى عندك فيقوم المخ بإعطاء إشارة تخلى كل الهرموات بتاعة القلق تنزل للجسم وتلفى فى نفس الدائرة تانى
إنتى محتاجة تعودى مع مختص علشان تبدأ تتعاملى مع كل الأفكار اللى بتخلى الخوف والقلق والتوتر تنشأ من الأساس لإن حل الأمور بالتعامل مع الأفكار دى والتغلب عليها وليس بفكرة التعامل مع الجن
فالمختص هيعملك خطة علاج كاملة تمشى عليها فترة علشان تهدى من القلق علشان جسمك يهدى والأمور متطورش أكتر من كده
-
السلام عليكم
بسم الله الولى
أولاً ربنا يباركلك فيهم ويصلح أحوالهم كلهم ويجعلهم ذرية صالحة
ثانياً الولاد فى السن ده بيكونوا محتاجين لأب وأم علشان يقدروا يشبعوا كل إحتياجاتهم النفسية فممكن تبدأ تعودى قاعدة بصدق مع زوجك السابق وتقوليله تربية الأولاد مسئولية مشتركة بينا ولازم نتعاون فيها أن نساعدهم يكونوا شخصيات متزنه وأنا محتاج منك إنك تساعدنى فى ذلك فلو وافق يكون خير وبركة هتعودوا وتتفقوا سوا هتعملوا إيه مع كل الأولاد
ثالثاً لو هو رفض أن يشترك معاكى أو قالك هما معاكى دلوقتى وأنا مليش دعوة فهنا تخدى نفس وتستعين بالله وتنوى إنك تربيهم وتكونى الأب والأم ليهم وأن شاء الله ربنا هيقدرك وقتها وفى ناس كتير نجحت تعمل كده مع ولادها بس ممكن تعودى مع مختص فى التربية علشان مرحلة المراهقة ليها شوية مفاتيح تخليكى قادرة تتعاملى معاه بشكل أفضل بدون ما تبذلى مجهود فى الفارغ
وربنا يقدرك ويقويكى عليهم وتفرحى بيهم دايما