نشوى حيده Heda
تم إنشاء إجابة طبيب
-
السلام عليكم ورحمه الله
التعرض للاذى النفسي او البدنى باى شكل من الاشكال بيكون له تأثير علي نفسيه وحياه الشخص اللى تعرض للاذى ده وردود الافعال والتغلب على مشاعر الالم والقدره علي نسيانها بيختلف من انسان للتانى
فلو مش قادره تتغلبي عليها وتجعليها تجربه تعلمتى منها الكثير ، او تجربه خرجتى منها اقوى من الاول … يبقي اكيد هتحتاجى مساعده من طبيب او معالج نفسي يساعدك في التغلب علي مشاعر الالم وعدم الثقه بالنفس والتعافي من التعرض لهذه التجربه والاهم هو قدرتك علي استكمال حياتك بشكل افضل وبنفسيه احسن باذن الله
ربنا يوفقك لكل خير
-
السلام عليكم
كل اللى انتى حاسه بيه ده ناتج من ان الاهل مقدروش يفهموكى قيمه نفسك وقيمه وجودك في الاسره وقيمه وجودك في الحياه اصلا ، بل بالعكس احتمال كان فيه انتقادات كتيره وتغليط علي كل موقف او غلط بتعمليه لغايه مابقيتى خايفه من انك تغلطى وانك هاتتعاقبى لو غلطى، وده طبعا خلا ثقتك بنفسك معدومه نهائيا و خلاكي تخافي من الناس وتخافي تغلطى قدامهم وبالتالى تبعدى عنهم
علشان ترجع ثقتك في نفسك وفى قيمتك في الحياه وتعرفي قيمه الحياه نفسها وتتعلمى ازاى تقدرى نفسك وقدراتك بنفسك ومن جواكى من غير ماتنتظرى حد يمن عليكى ويشعرك بالثقه دى او يمنحها لكى وممكن يمنعها عنك تانى في اى وقت بمزاجه
لازم تلجأى لمعالج نفسي يقدر يعلمك ازاى تكتسبى ثقتك بنفسك (بنفسك) وازاى تعرفي قدراتك وازاى تنميها وكمان ازاى تكون علاقاتك بالمحيطين بيكى علاقات ناجحه وسويه
ربنا يوفقك لكل خير
-
السلام عليكم
اولا تم تشخيص حالتك علي انها ايه بالظبط؟؟، ومين اللى شخصها ؟؟
لازم الطبيب او المعالج اللى شخص حالتك هو اللى يعرف طريقه التعامل او العلاج معاك هايكون ازاى
وعن طريق التفاصيل اللى هاتحكيها له وتشخيص حالتك ، هايقدر يضع خطه علاج مناسبه لك وتتحسن الحاله للافضل باذن الله
ربنا يوفقك لكل خير
-
السلام عليكم
لكل سلوك مش طبيعى او غير سوى ..اسباب ، ممكن الانسان يبوح بالاسباب دى بوضوح او يخبيها او يداريها او يخجل من انه يبوح بيها حتى لو لاقرب حد ليه ،
اكيد فيه اسباب ادت الى نفور او ابتعاد زوجتك عن مبادلتك المشاعر او العلاقه الخاصه بشكل عام ، والاسباب دى ممكن تكون اسباب نفسيه او جسمانيه وهى مش قادره تصارحك بيها بسبب خوفها من انك تزعل او خجلها في انها تذكرها ليك ،
رأيي انك تخليها تلجأ لمعالجه نفسيه او طبيبه نساء وتوليد وسيبها هى اللى تختار تروح لمين فيهم (علي حسب الشكوى اللى هى بتشتكيها ) والطبيبه او المعالجه هايفهموا سبب البعد او النفور ده ايه وهايبلغوك و باذن الله تتعالج الاسباب دى وتزول وترجع زوجتك تتعامل معاك بشكل طبيعي وبطريقه ترضيك باذن الله
ربنا يوفقكم ويهديكم لكل خير .
-
السلام عليكم
اللى احسن من المهدئ ، انك تعرفى الاول سبب الانفعال والعصبيه لاتفه الاسباب دى ليه وتحاولى تمنعي او توقفى اللى بيسببلك ده من الاساس ، وكمان ازاى تقدرى تتحكمى في عصبيتك وغضبك وازاى تهدى نفسك علشان تربي اولادك بطريقه ايجابيه وبحكمه ومش بزعيق وشخط وعصبيه
حاولى تلجأى لمعالج نفسي يتكلم معاكى ويعرف سبب الحاله دى ايه ويساعدك علي حلها وعلاجها عندك حتى لا تؤثر سلبيا علي ابنائك وعلى علاقتك بيهم الان وفي المستقبل
ربنا يوفقك لكل خير
-
السلام عليكم
ابنك بخير الحمد لله اطمنى ، لكن محتاج انك تعرضيه علي حد متخصص في تعديل السلوك علشان يعرف ايه اسباب الخجل والانطواء والخوف اللى عنده من التعامل مع زملائه وسبب عدم مقدرته التواصل معاهم بشكل جيد ، وهل التبول اللا ارادى ده بسبب اضطراب علاقته بزملائه في المدرسه ولا بسبب البيت والاسره ولا بسبب ايه ، لان واضح ان التبول اللارادى هنا سببه نفسي وليس عضوى
شفاه الله وعافاه وباركلك فيه .
-
السلام عليكم
كل اب وام اكيد كل همهم في الدنيا مصلحه اولادهم ، حاول معاهم كتيييير بانك تقنعهم بقد ايه انت محتاج علاج نفسي و طمنهم ان العلاج الدوائى و العلاج المعرفي السلوكى مع بعض مهمين جدااا لتحسن حالتك و عن طريقهم هاتتخلص باذن الله من كل الاعراض اللى انت حاسس بيها و بتخليك مش قادر تعيش حياتك بشكل طبيعي وسليم
تمنياتى لك بالشفاء والتوفيق
-
السلام عليكم
ارجو منك انك تتحملى كلامى ومتزعليش منه،
ابن حضرتك 28 سنه وعنده اكتئاب شديد ومش بيخرج من البيت وعصبى وبيكسر كل اللى حواليه من شده الاضطراب النفسى اللى بيمر بيه وعنده تعب في اذنه والسمع ضعيف ،
حضرتك ليه متمش علاجه من صغره وهو طفل كان ممكن يتعالج بسهوله وخطوات العلاج هاتكون اسهل عليه وعليكى لو تم الاهتمام به من اول ما ظهر عليه اى عرض لاى مرض او اى اضطراب نفسي ، ومكانش زاد عليه بالشكل ده وتراكمت عليه الاضطرابات النفسيه اللى وقفت حياته حتى وصل الى 28 سنه وضاع من عمره سنوات في الكأبه والعزله عن الناس والاصحاب وانعدام العلاقات في حياته الى هذه السن !!!!
ارجو الاسراع بعرضه على طبيب نفسي وطبيب انف واذن لعلاجه من كل الاعراض اللتى يشعر بها قبل فوات وضياع سنوات كثيره اخرى من حياته هدر و ايضا لعدم تفاقم الحاله اكثر فاكثر.
تمنياتى له بالشفاء (العاجل) امين يارب
-
السلام عليكم
فيه جمله لفتت نظرى في سؤال حضرتك ، وهى (بمرور الايام بقي شاب ومش بيخرج من البيت )
حضرتك ليه ابنك ماتعالجش من صغره وهو لسه طفل صغير ، لو كان اتعالج وهو طفل من ضعف السمع او من الاكتئاب او من اى اعراض بتظهر عليه او من اى مرض موقفله حياته او بيعوق تقدمه في الحياه ، كان عاش حياه طبيعيه وكان هايبقي له اصدقاء يخرج معاهم ويتعامل معاهم ، ولان عنده ضعف سمع فده اللى مسبب له التلعثم وعدم النطق بشكل صحيح ، لذلك بيخاف يخرج لان اولا معندهوش اصدقاء كونهم من صغره ، وكمان بيخاف من تنمر اى حد عليه بسبب التلعثم وضعف السمع
كل ما العلاج بدأ بدرى اول ما الطفل يشعر باى مشكله او اعراض تظهر عليه كلما كان العلاج اسهل واسرع والطفل قدر يعيش حياته بطريقه سويه واجتماعيه افضل ومكنش وصل ل 28 سنه وحياته متوقفه بهذا الشكل
ارجو الاسراع في علاج السمع اولا ثم علاج مشكله الكلام والتخاطب ثم علاج الاكتئاب عند طبيب نفسي لانه ممكن يحتاج للدواء بجانب العلاج النفسي
اتمنى له الشفاء (العاجل) باذن الله
-
السلام عليكم
ما ذكرته في سؤالك من اعراض تشعر بها ليس كافيا لتحديد ما تعانى منه او تشخيص حالتك بشكل سليم وعلمى ، هناك اكيد تفاصيل كثيره ادت الى وصولك لهذا الشعور بالدونيه وبانك حاسس انك (جزء من الالف ) كما وصفت نفسك في سؤالك وانك حتى مش قادر ترتقي وتتقدم في شئ ،
انصحك تلجأ لمعالج نفسي يقدر يساعدك في معرفه اسباب المشاعر دى ايه و يساعدك في علاجها وتصحيح مفاهيمك تجاه نفسك ومعرفه قدراتك ومميزاتك بشكل افضل باذن الله
تمنياتى لك بالتوفيق