نشوى حيده Heda
تم إنشاء إجابة طبيب
-
السلام عليكم
انتى عارفه انتى بتفكرينى بايه ؟؟ بحد طالع رحله مدتها ثلاث ايام وهو مسافر زعلان انها ٣ ايام فقط ولما وصل للمكان اللى رايحله مكتأب انه هايرجع بعد ٣ ايام وانتهت الرحله ورجع اشد حزنا واكتأبا لان الايام خلصت
ولما رجع لاهله سألوه عملت ايه وشوفت ايه وقضيت وقتك ازاى … احكيلنا .. فرد عليهم : معملتش حاجه وماشوفتش حاجه وماستمتعتش بحاجه ولا فاكر الاكل الحلو اللى اكلته ولا اخدت بالى من الناس والصحبه اللى كانت معايا ، …. ولما سألوه ليه ده كله ؟؟
قالهم : انا مكنتش مركز في ده كله ، انا كنت مركز فقط في حزنى وزعلي ان الاجازه او الرحله هاتخلص بعد ٣ ايام !!!!!!
شوفتى بقي … انه ضيع الرحله والاجازه والاستمتاع بيها وبالجو والاكل والصحبه واللعب والجرى ، كل ده علشان باصص للنهايه فقط ومركز عليها ومش شايف غيرها
او واحد بيمتحن وبدل مايجاوب في ورقه الاجابه ، قاعد خايف ومرعوب ان مده الامتحان هاتخلص امتى وياترى هايعرف يحل ولا لا ، لحد ما خلص الامتحان وهو محلش حاجه وسقط في الاخر ولم ينجح !!!!
كلنا هانموت في يوم وساعه ولحظه معينه ، دى الحقيقه المؤكده الوحيده في الحياه ..تخيلى ، وحتى وقت النهايه مانعرفش امتى هاييجى ولو فضلنا مش شايفين غير اليوم ده واللحظه دى… يبقي عمرنا ماهانعيش الحياه ولا هنحل في الاختبار اللى كل واحد مننا جاى الدنيا دى علشان ينجح ويتفوق فيه وهانسيب الدنيا واحنا لا حلينا ولا نجحنا ،
خلى تفكيرك وتركيزك كله في ازاى تعيشي الحياه اللى ربنا وهبها لكى وازاى تأدى المهام اللى مطلوبه منك في الحياه عامه ، وازاى يكون وجودك في الحياه له فايده واهميه لكل اللى حواليكى ، وازاى تسيبى بصمه واضحه للى هاييجوا بعدك وينتفعوا منها،
وازاى تستمتعى اثناء رحله الحياه دى بكل شئ يسعدك ويفرحك وفي نفس الوقت يرضي ربنا سبحانه وتعالي .
اطال الله في عمرك بالخير والنفع لكى ولكل من حولك ، امين يارب
-
السلام عليكم
اى اضطراب نفسي او مرض نفسي مش بنتولد بيه يعنى الطفل مش بيتولد عنده اكتئاب ، او عنده وسواس قهرى !!!!
لكن اللى بيسبب الاضطرابات والامراض النفسيه هى البيئه والناس اللى حول الطفل ده وبيكتسب منهم كل العادات والتصرفات اللى ممكن تكون مريضه او غير سويه ،
حاله الوسواس القهرى اللى عندك محتاجه مساعده من اخصائى نفسي او معالج نفسي يتكلم معاك ويعرف اسباب الوسواس ده نابع من ايه عندك علشان يقدر عن طريق العلاج المعرفي السلوكى انه يساعدك تتغلب على هذه الوساوس وازاى تتعامل معاها لما تسيطر عليك
نصيحتى لك انك تبدا العلاج ده قبل دخولك في مشروع شغلك الجديد علشان حالتك ما تأثرش سلبيا عليه ، ويكون تركيزك كله في شغلك بدل ماتركيزك يتشتت بين الوسواس والقلق والخوف وده ممكن يأثر علي نجاح مشروعك
تمنياتى لك بالشفاء العاجل والنجاح والتوفيق في عملك باذن الله .
-
السلام عليكم
ذكرت في سؤالك انك ذهبت لدكاتره كتييييير
لكن لم تذكر تشخيص الدكاتره دول لحالتك ايه ؟؟ وايه اسباب الاعراض اللى بتظهر عليك دى ؟؟
عموما ترتيب العلاج بيكون كاتالى :
الاول بتكشف عند الدكاتره المتخصصين في حالتك زى امراض الرئه والصدر (عشان الكتمه وضيق التنفس اللى بتشعر بيه )
مخ واعصاب علشان الاغماء اللى بيحصلك وانت نايم وعدم التركيز
وهكذا .. اى اعراض تشعر بيها تكشف عند الطبيب المتخصص فيها
ولو كل الاطباء قالولك ان معندكش حاجه والتحاليل بتقول انك كويس…. اذن كل الاعراض دى هاتكون سببها نفسي لكن بتظهر عليك فى شكل تعب جسمانى ، هنا لازم تلجأ لطبيب نفسي او معالج نفسي يساعدك في معرفه اسباب الحاله دى ايه ، ويساعدك في علاجها باذن الله .
شفاك الله وعافاك
-
السلام عليكم ورحمه الله
المشكله مش مين السبب ومين الغلطان ، انتى ولا الناس ..
الحكايه ان الناس اللى بنتعامل معاهم بيشوفونا بنفس الصوره اللى شايفنها احنا عن نفسنا ، يعنى لو شايفين نفسنا اقويه نفسيا (هما هايشوفونا كده برضو)
ولو شايفين نفسنا ضعفاء وقليلى الحيله (هيشوفونا كده هما كمان)
يعنى اى صوره او انطباع بناخده ونصدقه عن نفسنا ده بيخلى الناس اللى حوالينا يشوفونا بنفس الصوره وبنفس الانطباع وبيأكدوه لنا ليل ونهار وكل ما يشوفونا او يتعاملوا معانا
وانتى شايفه نفسك(ضعيفه ، انطوائيه، خجوله، ضعيفه ، قليله الحيله ، الناس بتتريق عليكى وانتى مش عارفه تردى عليهم ولا توقفيهم عند حدهم ، بتدعي ربنا انك تكونى قويه (وده اعتراف وتأكيد مستمر لعقلك الباطن انك ضعيفه وقليله قدام نفسك )
كل الرسايل دى انتى عماله تبعتيها يوميااا لعقلك الباطن لغايه ماصدق فعلا وتاكد له انك فيكى كل الصفات دى ، وانك لايمكن ومستحيل هاتقدرى تغيريها
لا… كل الافكار والمشاعر السلبيه ممكن تتعالج وتتغير وتتحول من افكار سلبيه عن نفسنا وعن الغير .. الى افكار ومشاعر ايجابيه وتتغير ساعتها نظرتنا لنفسنا ونظرتنا وسلوكنا تجاه الغير
كل اللى انتى محتاجاه انك تلجأى لمعالج نفسي او اخصائى نفسي وعن طريق الجلسات النفسيه هايساعدك في تعديل وعلاج افكارك ومشاعرك تجاه نفسك وتجاه الناس والعلاقات كلها من حولك ، وازاى تقدرى تشوفي نفسك صح وتقدريها صح وتعرفي قدراتك ونقاط قوتك وازاى تستغليها بطريقه صحيحه وازاى تقدرى تواجهى اى تنمر او اسائه ممكن تتعرضى لها .
تمنياتى لكى بنفسيه قويه وصلبه ، لا تنكسر بسهوله مهما تعرضت للتنمر او للضغوط .
-
السلام عليكم ورحمه الله
خطوه كويسه منك جدااا انك تلجأ لمعالج نفسي يساعدك في حل مشكلتك
لكن مفيش داعى ابداااا انك تقلق او تخاف من ان المعالج ده هايخرج اسرارك او يحكى مشكلتك لاى حد لان دى امانه هو مايقدرش يخونها او يخونك وزى مهنه الطب في جميع التخصصات فيه ميثاق متفق عليه وهو ان للمريض اسرار لايمكن يطلعها الطبيب لاى حد كذلك برضو مهنه المعالج النفسي او الاخصائى النفسي ميقدرش يخرج اسرارك ولا يحكى مشكلتك لاى حد مهما كان
ف اطمن خاااالص ان مشكلتك اللى حكيتها للمعالج النفسي هى سر بينك وبينه و عيش حياتك بشكل طبيعي وانت مطمن جدااااا
وفقك الله لكل الخير .
-
السلام عليكم
الاعراض اللى ذكرتها في سؤالك ممكن تكون اعراض رهاب اجتماعي وده ممكن يكون بسبب تربيه انطوائيه او منعزله بعض الشئ عن الناس وعن التجمعات وده طبعا بيسبب شعور الطفل بالخوف من التعامل مع الناس وعدم الثقه في نفسه والخوف من الخطأ امام الناس وبالتالى الانعزال والبعد عنهم .
والعلاج منها يكون : انك تلجأ لمعالج نفسي او متخصص نفسي يقدر يساعدك في تغيير مفاهيمك تجاه الناس وتكسير الخوف والرهبه من التعامل معاهم وازاى تقدر تقوم بكل مهام حياتك من تعاملات مع الناس او شراء احتياجاتك او المشى في الشارع و الدفاع عن نفسك .
وباذن الله مع الوقت والتدريب ، هاتقدر تثق في نفسك وفى قدراتك و في التعاملات بشكل عام.
ربنا يوفقك لكل خير .
-
السلام عليكم
كويس اوى انك تعترفي بانك محتاجه مساعده من حد متخصص ، لكن لو هاتلجاى للمتخصص ده فلازم تلتزمى بخطوات واساليب العلاج عشان حالتك تتحسن ،
اما بالنسبه لوالديكى فحاولى تكلمى حد يكون قريب منهم ليكى وقولى انك محتاجه المساعده دى جداااا واكيد مش هايمنعوا عنك العلاج او المساعده،
ولو فعلا مش هاتقدرى تقوليلهم ، ممكن تتعاملى مع معالجين نفسيين اون لاين واسعار الجلسات بتكون مخفضه وساعات مجانيه كمان
ربنا يوفقك لكل الخير باذن الله
-
السلام عليكم
الاعراض اللى بتوصفيها بتبلد المشاعر هى درجه من درجات الاكتئاب، واللى حاسس هو بيه ده سببه انه فاقد قيمه نفسه وفاقد قيمه الحياه نفسها ، قد يكون بسبب احباطات حدثت له من ناس قريبين منه إي (تبلد المشاعر بعد الصدمة) فده خلاه يخاف او يفضل الابتعاد عن الناس
عموما لاحسن يتعرض لاذى نفسي اخر منهم.
لكن في نفس الوقت مش مرتاح من البعد عن الناس ومن العزله دى.
في رأيي ((بما انه مش عايز يلجأ لمعالج نفسي)) ، ان المحيطين به اللى بيحبوه فعلا ويهمهم حالته النفسيه يظهروا له حبهم واهتمامهم بيه ويشعروه بقدره الكبير عندهم وفي قلوبهم فده يرجعله الثقه في نفسه ويحس انه محبوب وله قيمه وقدر كبير عندهم ويطلبوا منه انه يؤدى لهم مهام معينه ويحسسوه انه هو بس اللى يقدر يعملها وان مفيش حد غيره يعرف يحل المشكله دى مثلا، وياخدوا رأيه دايما في مواضيع مختلفه …وهكذا دور في الحياه وانه لسه مهم في حياه اللى حواليه وهايديله ثقه في نفسه وفي
لان ده هايخليه يتاكد ان له قدراته
وشويه شويه هيتخلص من الشعور بتبلد المشاعر وهايحس بقيمه الحياه وهاتبدا ثقته بنفسه وبالناس ترجع تانى باذن الله
** اكتر حاجه تخلى الانسان يفقد شغفه للحياه وللناس انه يشعر انه مالوش اى قيمه ولا اهميه ، ولا له اهداف في الحياه يعيش عشان يحققها .-
تم تعديل هذا الإجابة منذ 11 الشهور و 3 أسابيع بواسطة
صحة سكاي .
-
تم تعديل هذا الإجابة منذ 11 الشهور و 3 أسابيع بواسطة
-
السلام عليكم
لحد 12 سنه كان فيه تأخر في الكلام ؟؟؟؟
تأخر الكلام عند الاطفال بيبدأ يتعالج من ٣ او ٤ سنين ، يعنى في اول حياه الطفل وبدرى اوى علشان يدخل المدرسه ويكون قادر على التخاطب والكلام بشكل سليم وطبيعي ومايحسش باى نقص او اختلاف عن باقي زمايله
لكن بنتك قضت سنوات كتيره من عمرها وعندها مشكله في الكلام والتواصل مع اللى في سنها وجايز حصل معاها تهتهه وجايز كان فيه تريقه عليها ودة من أهم أسباب العصبية عند الاطفال
كل ده ادى الى عدم ثقتها بنفسها والعنف مع اخواتها اللى شايفاهم بيتكلموا كويس وبشكل طبيعى وهى لأ ، وطبعا فيه تأخر في الدراسه لانها احتمال تكون مش عايزه تروح المدرسه اصلا لانها مش قادره تتكلم وتستوعب زى زمايلها ولان تفكيرها وتركيزها كله في التنمر اللى هى خايفه يحصل لو اتكلمت معاهم او اتكلمت امام الفصل لو اتطلب منها الكلام
لازم تلجأى لمعالج نفسي او اخصائيه نفسيه تعالجها نفسيا بالعلاج المعرفي السلوكى او اخصائيه في تعديل سلوك الطفل علشان تصحح وتعالج باذن الله كل السلوكيات الى بنتك بتتعامل بيها واللى هى ناتجه كلها من تاخر الكلام لسنواتانا اللى اسفه على الاطاله ، مش انتى .
اتمنى ليها وليكى كل التوفيق