نشوى حيده Heda
تم إنشاء إجابة طبيب
-
السلام عليكم
سؤال حضرتك مش موضح حالتك بالتفصيل ، لازم تلجأ لمعالج نفسي يقدر يسمعك ويعرف ايه اسباب تقلب حالتك المزاجيه كده باستمرار وازاى تتعامل مع اى مثيرات ممكن تقلب مزاجك او تخلى حالتك النفسيه مضطربه كده،وكمان يحاول يعرف منك ايه سبب رغبتك في الانعزال عن الناس وعدم القدره على التعامل معاهم .
وهو اللى هايقولك العلاج هايكون ازاى وهل حالتك تستدعى علاج دوائى ولا علاج معرفي سلوكى فقط
ربنا يوفقك لكل خير .
-
السلام عليكم
القلق و الرهاب الاجتماعى من الاضطرابات النفسيه اللى بيحتاج الانسان فيها اللجوء لمعالج نفسي او طبيب نفسي يساعده في معرفه اسباب القلق واسباب الخوف من التعامل مع الناس ومخالطتهم وتوقع الاذى منهم (وقد يكون شعور غير حقيقي).
والمعالج هو اللى هايحدد لك طرق العلاج هاتكون ازاى ،
ربنا يوفقك لكل خير .
-
السلام عليكم
ايوه ممكن حالتك تتغير ، وتتصلح علاقتك بالناس وبأهلك باذن الله
لكن ده محتاج مساعده من حد متخصص سواء معالج نفسي او طبيب نفسي عاشان يقدر يتكلم معاكى ويفهم ايه سبب الخوف ده من الناس وسبب الرهاب الاجتماعى ده ايه ، حتى لو كانت حالتك دى منذ الطفوله و مستمره معاكى حتى الان
ولجوئك للعلاج النفسي هايقلل من توترك وخوفك من الناس ويساعدك انك تعرفي ازاى تتواصلى معاهم بشكل افضل ومريح بالنسبالك.
ربنا يوفقك لكل خير دايما .
-
السلام عليكم ورحمه الله
حاله اليأس والاحباط وعدم الرغبه في الحياه اللى انت حاسس بيها دى كلها ممكن تكون بسبب احلام واهداف وطموحات مقدرتش تحققها او ملاقيتش حد يشجعك ويساندك ويقف جنبك علشان تحققها ورميت كل المسئوليه على الناس والاهل وان محدش فيهم بيطبطب عليك ويشجعك ،
انا معاك ان اى انسان في الدنيا محتاج حد يسانده ويقف جنبه ويشجعه ، لكن لو مفيش الحد ده .. هل ده يبقي مبرر انك تستسلم وتنعزل وتكره الناس و الحياه وتنتحر ؟؟؟
ربنا سبحانه وتعالى خالق في كل مخلوقاته (مش في الانسان فقط) حب الحياه ، واراده ورغبه قويه جدااا للبقاء ولتحقيق الاهداف والامال في الحياه وللتغلب على اى صعوبات ممكن تواجه الانسان او المخلوق ده في حياته (سواء جنبه حد بيساعده ويسانده او عايش لوحده )
حتى لو اختفت الناس من حياتك تماما استشعر دايما وجود ربنا معاك في كل وقت وفي كل نفس بتتنفسه وفي كل مكان ، دايما جنبك بيساعدك ويقويك ويشجعك وعايزلك كل الخير وكل النجاح وكل السعاده ، لانه هو الرحمن الرحيم ، استعين بيه دايما في كل امورك وفي تحقيق احلامك واهدافك اللى بتتمنى تحققها ، واوعى تستمع لاى كلام محبط او لاى حد هايقولك انك مش هاتقدر ومش هاتنجح …. لأ هتقدر وهتنجح وهتوصل لكل اللى بتتمناه باذن الله لان معاك ربنا سبحانه… سند وظهر وعون ليك
اطرد كل احباط الماضي واطرد كل كلام الناس اللى بتحبطك وبتكسر في مجاديفك ، اطرد كل ده من دماغك ومن قلبك واستعين بالله وابدأ حياتك بشكل جديد وروح جديده ونفسيه جديده
ربنا يوفقك ويهديك لكل خير
-
السلام عليكم
التفكير الزائد وخوفك من كلام الناس و تعليقاتهم وانتقادهم ليكى …. كل ده معناه ان ثقتك بنفسك قليله شويه ، وده اللى بيخليكى دايما عامله حساب الناس وانتقادهم لاى تصرف منك ،
علاج ده …
انك تعرفي ان مفيش حد فينا كامل ابدااا لان الكمال لله وحده ، والناس اللى انتى خايفه منهم دول ، هما كمان عندهم عيوب بيداروها وخايفين حد يعرفها وينتقدهم بسببها (مش انتى لوحدك يعنى)
كل اللى عليكى تعمليه انك تعيشى بطبيعتك وبشخصيتك الحقيقيه وماتهتميش ابدااااا برأى الناس فيكي ، مادمتى مش بتأذى حد او بتجرحى حد بكلامك وبتتعاملى بذوق واخلاق مع الناس ، خلاص ماتهتميش برأى اى حد مهما كان
ولو اى حد انتقدك او انتقد كلامك او تصرفاتك ، راجعى نفسك كده دقيقه بينك وبين نفسك، لو لقيتى النقد ده صحيح وانتى غلطتى فعلا ، يبقي تعتذرى عن الغلط ده وخلاص ،
ولو فكرتى ومكنتيش غلطانه في اللى عملتيه والناس دى بينتقدوكى للانتقاد بس ولكسرك او لتقليل ثقتك بنفسك ، ماتهتميش لكلامهم وارميه ورا ظهرك وكملى حياتك عادى جدا ولا تتاثرى بكلامهم ابدااااا
تأكدى ان كل انسان فينا فيه المميزات اللى بتميزه عن غيره وفينا العيوب اللى بنحاول نداريها وبنحاول نصلحها ونعالجها ، لاننا مش ملائكه ولا معصومين من الخطأ
ثقى بنفسك وبمميزاتك وبقدراتك اللى ربنا خالقها فيكى وافرحى واستمتعى بيها وبحياتك
-
اهلا بحضرتك ..
شفاكى الله وعافاكى
انا لست طبيبه ، انا اخصائى دعم نفسي وارشاد اسرى وزواجى
ولكن نصيحتى لك انك لابد ان تتوجهى اولا الى طبيب مخ واعصاب او طبيب امراض القلب لتشخيص الحاله اكلينيكيا وعمل التحاليل والفحوصات اللازمه لمعرفه اسباب ضربات القلب السريعه ورعشه اليدين
ثم التوجه للمعالج النفسي او الطبيب النفسى اذا لذم الامر لمساعدك في التخلص من الهلع و الخوف واى اضطراب تعانين منه
تمنياتى لك بالشفاء العاجل 🌹
-
السلام عليكم ورحمه الله
كتبت في رسالتك انك بتتعالج من القلق العام لمده ٣ سنوات ومع معالجين نفسيين من كام شهر … طيب مطلبتش منهم يساعدوك في حل مشكلتك النفسيه تجاه البنات او تجاه زميلاتك في العمل ؟؟
الغريب انك في مجال الاعلام ، يعنى هتلاقي نماذج كتييييييره من البنات اللى ممكن ترتاح في التعامل معاها
عموما … متاخدش البنت اللى كانت بتستغلك مقياس وتقول ان كل البنات هاتكون كده … لا … مش كل البنات بتستغل الشباب بالشكل ده ، وماتخليش ده يخوفك او يعقدك من الارتباط باى بنت تانيه
دور في محيط عملك على البنت اللى تكون مناسبه لشخصيتك ولطباعك وتكون سلوكياتها وطباعها متشابهه معاك و ماتسمحش لحد يستغلك بالشكل ده تانى ، لان البنت المهذبه واللى بتحترم نفسها واتربت على الحياء والاصول ، ماتطلبش طلبات زى دى من شاب لسه بتتعرف عليه !!!!!!!
توكل على الله واطلب منه يوفقك ويهديك للبنت اللى ترطبت بيها وتكون مناسبه ليك و تعيش سعيد معاها طول العمر باذن الله .
-
اما بالنسبه لنومك الكتير طوال النهار او عدم رغبتك في انك تخرج وتقابل الناس وبتروح شغلك مكرها …. فده نتيجه طبيعيه لانك فاقد شغفك بالحياه ومفيش هدف واضح بتسعى له في الحياه يشجعك ويحفذك انك تشتغل وتتعب للوصول له ولتحقيقه
حط هدف او مجموعه اهداف لك في الحياه وحاول تحققها ، وصدقنى اول ما هاتحقق هدف واحد منهم هاتحس بطعم الحياه وبنعمه انك لسه عايش وبتتنفس وبتحقق كمان اللى بتتمناه بالاستعانه بالله وبحوله وقوته
اطلب الهدايه والتوفيق من الله وحده وهو اللى هايهديك ويرشدك للى فيه خير لك باذن الله
تمنياتى لك بالتوفيق والسعاده .
-
السلام عليكم
من رسالتك عرفت قد ايه ربنا بيحبك لانه اظهرلك عيوب الانسان ده على مدار اربع سنوات ضيعتيهم من عمرك في علاقه سامه وشخص غير سوى نفسيا ، بيلعب ببنات الناس باسم الحب و وبيلعب على احساس الامومه عندك ( اللى موجود في كل انثي ) انك تقفى جنبه وتستحمليه وتحاولى اصلاحه وتصبرى عليه والوعود الكاذبة بانه هايتغير ومش هايرتكب الافعال دى تانى …… وهكذا
لحد ما تقعى في شباكه وتتجوزيه وتبدا معاه اسوأ حياه ممكن تعيشيها على وجه الارض واللى بتكون غالبا نهايتها مأساويه
فرى هاربه من اى انسان غير سوى وغير مسئول وبيرتكب محرمات وبيخون و بيؤذى نفسه لانه بعد كده هايؤذيكى انتى لما يمتلكك و ساعتها هايكون التخلص منه بصعوبه شديده ويمكن مستحيل الا بخسائر فادحه .
اهربى …..🏃♀️
-
السلام عليكم
مشكله عدم البكاء ممكن تكون لها اسباب عضويه او اسباب نفسيه او ماتكونش مشكله من اصله
عضويه … لو فيه مشكله في مجرى الدمع او انسداد فيه وده بالكشف ممكن تتاكدى من سلامه مجرى الدمع
نفسيه … انك تكونى من الشخصيات الكتومه في تعاملاتك مع الناس ، فلما بيحصل موقف او حادث او حاله وفاه بيكون رد فعل عقلك الباطن (بدون تحكم منك ) ان ماينفعش تظهرى مشاعرك او تبان دموعك قدام اى حد او تبانى ضعيفه امام الناس
وممكن كان فيه حد من صغرك في التربيه وانتى صغيره ، كان بيرغمك على عدم البكاء او يشخط فيكى علشان تسكتى وماتعيطيش او كان بيتقالك اوعي تعيطى او بيتقالك لو عيطى هنضربك …. وهكذا
كل دى احتمالات لانى معرفش طبعا طريقه التربيه اللى مريتى بيها في صغرك
واخيرا … ممكن ماتكنش مشكله من اصله ، وده لان الشخص اللى مات مثلا مكانش له معزه جامده في قلبك تجاهه او مفيش ذكريات حلوه مرت بينكم فتفتكريها فتنزل دموعك غصب عنك ،
دى كلها احتمالات لعدم البكاء .
واتمنالك انك لا تبكى على غالى ولا على عزيز لديكى ابدااا ويكون بكائك دائما بكاء من شده الفرح والسرور دايما باذن الله