نشوى حيده Heda
تم إنشاء إجابة طبيب
-
السلام عليكم
احساس صعب فعلا انك تكونى عايزه حاجه ومش عايزاها في نفس الوقت ، او لما تجيلك تهربي منها ….
و احساسك انك بتهربي الان من اى بنت بتحاول تقرب منك وتبقي عايزه تصاحبك بالرغم من انك انتى بتبقي عايزه تصاحبيها …. ده خوف من الدخول في علاقه صداقه تانى وخوف من التعرض للجحود والامبالاه منها زى اللى اتعرضتى ليها مع اول صديقه ليكى ، فعقلك الباطن بيصورلك انك لو صاحبتى بنت تانى هايحصلك زى ما حصل معاكى قبل كده وهاتعمل معاكى زى ما عملت صاحبتك الاولى في حياتك
وده مش صحيح خاااااالص ….
لان الناس مش زى بعضها ، وكلنا مختلفين تماما عن بعض و الانسان طول ما هو عايش هايقابل ناس كتيييييير وهايتعامل مع ناس كتيييييير ، و اكيد طباعهم وسلوكياتهم هاتكون مختلفه ومتنوعه تماما عن بعض
ماتخافيش من الصداقه ، وماتستسلميش لاحساس الخنقه والنفور لما تقربي من اى صاحبه ليكى ، بالعكس كملى صداقه معاها وخليكى متوازنه في مشاعرك ، يعنى ما تقربيش منها اوى اوى وتلزقى فيها علي طول ولا تعامليها بجفاء و لامبالاه ،
واى علاقه صداقه تدخلى فيها ، لازم تبقي مهيئه نفسك انها ممكن تنتهى في اى وقت ، لان كل شئ معرض للزوال والانتهاء وبكده بتكون اعصابك هاديه ومفيش خوف من انتهاء العلاقه دى
كمان اختارى الصاحبه اللى شبهك في حاجات كتييير وبتحبوا حاجات كتير زى بعض ، علشان مايحصلش خلافات كتيره بينكم
ونصيحه اخيره … ماتحكيش كل حاجه عن حياتك الخاصه او اسرارك او اسرار اسرتك لاى صاحبه او صديقه مهما وصلت درجه حبك ليها او قربك منها …. لان النفوس بتتغير ، فلو حصل بينكم خلاف او افترقتوا لاى سبب ، ماتبقاش عارفه كل اسرارك وتضغط عليكى بيها او تبتذك بيها بعد كده
خلى دايما فيه حدود في التعامل بينك وبين اى حد ، وماتبقيش كتاب مفتوح للجميع ، الكل ممكن يقرأ اللى فيه بكل سهوله.
تمنياتى لكى بالتوفيق في علاقاتك وصداقاتك باذن الله
-
السلام عليكم
الادمان بكل اشكاله وصوره سواء ادمان للمخدرات او ادمان الإباحية .. هو في الاساس نوع من الهروب من الحياه ، من الضغوط ، من الوحده ، من الفشل ….. وهكذا
لكن بعد فتره يكتشف الانسان ان الادمان او هروبه من اى مشكله مخلاش المشكله تتحل ، بالعكس زادت و بدل مشكله واحده بقوا سلسله من المشاكل والضغوط والعقبات
اى ادمان بيقع فيه الانسان .. بيكون بسبب غياب الهدف او مجموعه اهداف يتمنى الانسان في تحقيقها او عدم وجود امل او طموح يسعى اليه لتحقيقه
حطى لنفسك هدف ولو بسيط في الاول ( حتى ولو كان حاجه عايزه تشتريها او اكله حلوه عايزه تاكليها …. ) وحاولى تحققيه ، لما هايتحقق هتحسي بفرحه كبيره وبعدها حطى هدف تانى وحققيه وتالت وحققيه … وهكذا لحد ماتبدأى تحطى اهداف كبيره تغير نظام حياتك للافضل وترتقي في حياتك
وصدقينى ، مع كل هدف بتحققيه هاتتغير نفسيتك تماما للافضل ولنظرتك للحياه ولقيمه الحياه
وعشان تعرفي قيمه الحياه واهميتها … تخيلى لو انسان مات خلاص وقالولوا هاترجع ساعتين للدنيا تانى تفتكرى هايقضى الساعتين دول في ملل او في خطا او في زعل او حزن … بالعكس هايكون عنده طاقه رهيبه انه يستغل كل دقيقه وثانيه واقل من الثانيه كمان في انه يحقق الحاجات اللى مقدرش يحققها لما كان لسه عايش في الدنيا
وادعي ربنا كتيييييير انه يفتحلك طرق الخير لكى ويهديكى للى فيه خير ليك باذن الله