-
مشاكل نفسية ووسواس قهري
كان عندي وساوس فكرية قهرية ووساوس في الوضوء ..لكن بعد ما اتخرجت زادت جداً الوساوس عليا وبقيت تعبان جداً .. روحت لدكتور وأخدت علاج اتحسنت شوية وبعدها رجعت أسوأ من الأول وظهرتلي وساوس جديدة ووساوس في الصلاة والوضوء
ومن فترة روحت عمرة وتعبت جدا هناك .. كنت بحس بالوحدة وأنا رايح المسجد أصلي وكنت حاسس بالوحدة وأنا وسط ناس كتير معرفهمش من جنسيات تانية وكنت تعبان جدا .. وكنت بتعب وأنا داخل غرفة الفندق وبحس فيها بكتمة
وللعلم كان أمي وإخواتي معايا
وزاد عليا الوسواس القهري جدا في الوضوء والصلاة
ورجعت من العمرة ولسة الوساوس دي موجودة عندي
وكنت هناك بحس بإحساس وحش جداً مش عارف أوصفه .. وكنت عاوز أرجع بلدي وبيتي لكن مش عارف فده كان بيجيبلي إحساس وحش برضو
بعدها رجعت مصر وروحت لقرايبنا في محافظة تانية .. أول ما نمت في الأوضة واتقفل عليا الباب وطفوا النور برا حسيت بالوحدة جدا وحسيت بنفس الإحساس الوحش جدا
المهم رجعت وبطلت الدواء إللي كنت باخده وراح مني الأحساس الوحش بس مازال موجود
ودلوقتي قاعد مستني مشروع معين أعمله عشان أشتغل والمشروع ده لسة قدامه وقت عشان يتنفذ .. فقاعد تعبان نفسياً وجايلي أحاسيس وحشة وإحساس بالقلق والتوتر والهم
وده بيخليني مش عارف أعمل حاجة في حياتي .. لا عارف أتعلم تصميم جرافيك زي ما كنت بعمل ولا عارف أعمل أي حاجة في حياتي وتعبان نفسياً من انتظار
ودلوقتي باخد أدوية مع دكتور تاني وباخد مهدأ بس مش عاملين حاجة
-
2 الإجابات
-
السلام عليكم
اى اضطراب نفسي او مرض نفسي مش بنتولد بيه يعنى الطفل مش بيتولد عنده اكتئاب ، او عنده وسواس قهرى !!!!
لكن اللى بيسبب الاضطرابات والامراض النفسيه هى البيئه والناس اللى حول الطفل ده وبيكتسب منهم كل العادات والتصرفات اللى ممكن تكون مريضه او غير سويه ،
حاله الوسواس القهرى اللى عندك محتاجه مساعده من اخصائى نفسي او معالج نفسي يتكلم معاك ويعرف اسباب الوسواس ده نابع من ايه عندك علشان يقدر عن طريق العلاج المعرفي السلوكى انه يساعدك تتغلب على هذه الوساوس وازاى تتعامل معاها لما تسيطر عليك
نصيحتى لك انك تبدا العلاج ده قبل دخولك في مشروع شغلك الجديد علشان حالتك ما تأثرش سلبيا عليه ، ويكون تركيزك كله في شغلك بدل ماتركيزك يتشتت بين الوسواس والقلق والخوف وده ممكن يأثر علي نجاح مشروعك
تمنياتى لك بالشفاء العاجل والنجاح والتوفيق في عملك باذن الله .
Log in to reply.